عرسٌ شعبي _4_قطع الجهاز

 قطع الجهيز 😍

(( أحمد مهموم.. قيعد عالسطوح وبتمو سيكارة قشق عم يدخّنا بالسرقة عن أبوه ونيطر سعدة تتروح عالعين منشان تعبي مي..عمنّو طريق العين من قدام بيتن  حتالِك يشوفا ويغمزا شي غمزة)) 😉

((وسعدة مانا قليلي بتضلّ مخفّقة عالعين كماني بدا تلمحو لاحمد لأنا مشتاقتلو كتير هية الرّخر ... 

((تناوقت أم احمد عليه من على صحن الدرج وهزّت براسا من قهرا عليه ونزلت لعند ابوه:

-- يابو احمد خلينا بقا نجوّزو لهالصبي ونفرح فيه حاجتو بقا.. مضي على خطبتو أكتر من  شهرين ... وروحا عبيت عروستو ماسيمحينلو يروح قال عيب..

 مرتين راح طلعو من منيخيرو عامص ..وكانت سعدة اكلت قتلة من اخوّا..... قال إيش أخوّا شاف إيد احمد دقرت بإيدا وقت طلب منا كبريتي منشان يشغل السيكارة.. !!

أبو احمد معصب 😡

-- ليش أحمد بيشرب تتن ؟ 

أم أحمد تلبّكت وحسّت إنها عفّست  وقالتلو : 

-- لك لااا لااا قصدي طلب منا كباية مي.. قريضة شقديني صايرة عبخربط هالايام 😅

المهم.. الصبي مانو مرتاح وبيضل صيفن ومهموم وأكل متل الخلق ماعبياكل.. 

والله صفّا ع نصو ريتو يقبرني ان شالله .. وعلى طول كِيفِت خلقتو..أشو نيطرين ليش ماعم نعمل العرس...

-- والله يامرا نحنا جاهزين بس بنّا نفضّي هالكم غرض م العلّيه ونعملّا وش حوّارة .. منشان نجبلو العفش وكم قطعة تييب للعروس ومتل ماوعدناهم بنّا نشتري المخمّس والزَرَدي والمصاري جاهزين .. إسا مبيرحا قبضنا حق موسم التفاح البركة.. كمان هنة أهلا للعروس مابعرف إزا حضّرو حالن وشدّو اللحف والمخدات والفرشات..

وقال بدن ياخدو حصيرة  كمان يكتّر خيرن  .. 

النقطة مستيهلي كانت والله .. مية وأربعين ورقة.. ونحنا كمّلناهم عالميّة وخمسين.. اي بيشترو الجهييييز وبضل كم ورقة بلكي منجيب فيون خويتم لان الحلق أمّا لبّستا ياه بالخطبي ...كنّا نيوين نجيبو...

وهاليوم المسا بلكي منروح انا وانتي وابوي الحجي ومنتفق ايمت  عقد لعقاد والعرس ومنقبّضن النّقد ونشوف اشو بضل م النقد بلكي كمان منجبلا قطعة دهب  ...  

-- الحمد لله يازلمي النقطة منيحة لأن نحنا زيرعين مع كل الضيعة.. وانت بحياتك مانقّطت أقل من خمس ورقات وأنا كماني ماني مقصّرا مع حدا.. وكنّتنا مابنّا ننقص عليها شي .. كلشي بتشتهيه...وبحضي رمينا صيت بالضيعة على هالشيت الأخدناه بالشّوفي ... اخدنالا شنتاي متروسي ترس .. وماناقصا شي.. طقم طلعة.. وفصطان تريفيرا  وجبوني سموكي.. وكنزة حمرا وتفريعتين للنوم ... وقندرا ..وبابوج عليه ريش .. وجزضان أبيض..  وغوا.. وقنية عطر .. اللي صرلا ماصار لحدا.. بس والله هالسعدة بتستيهل وما بضيع فيّا... 

 أنا طالعة عالسطوح خبّرو لحميدان بحضي تيطير عقلو م الفرح..😍 

------------- 

أبو احمد: أشو قلتو خيي ابو صطيف والله الخطبي الطويلي ماكيّسي وبصير فيّا لتّ وعجن.. ولاتواخزني بهالكلمي سمعت طراطيش حكي أنو ابن عمّا للبنت بدو يخربا للشغلي قال مابخليا تطلع غريبي برا العيلة.. اشو الشغلي مسخرا ؟؟  وماناقصنا مشاكل  ...

-- ابو صطيف: 

دشّك من هاللقش خيي ابو احمد كلو حكي عجيان ونحنا كلمتنا كلمي وماحدِك إلو علاقا... من جهتنا نحنا جاهزين.. بس البنت ضل عندا كم وش مخدة عم تشتغلن بالصنارة بيومين بتهيّيون .. الصلا عالنبي بهالشهرين ماخلت شي ومااشتغلتو.. اربع قطع قَنويشا .. وخروجي  للرّفّ و لغطا الديوانات  ولرفوف الخزاني.. ونزّالات.. ووتوش مخدّات.. واشتغلت شغل إبرة لقلب الكاسات بعد مانشّتو بالنّشا بحضي طلع معا شي بخلّ العقل.. وطبعا بنت خالتا تهاني الله يستر عليّا عاونتا بكم شغلي ...

-- أبو احمد : 

لكن خلينا نتوكل على الله ونروح عالجسر يوم الأحد الجاي  نقطع لجهيز... بس في مشكلة😁

- أشو فيه 🤔 .. بس مايكون سمعتو شي عن لسينّا لاسمح الله !!

-- لاء لاء.. اشو عمتقول انت يازلمي ماخْطيْ ؟؟ 

بس المشكلة غلطنا وقلنا لأهل الضيعة مين حيبب يروح معنا ع قطع جهيز سعدة ... الكل اتجقمق وقال انا بدي روح .. اي بدي احجز بوصطة كبيري حتّالك تساع كل هالخلق..وبيكاب لجيب العفش..

--الله يكتّر لمحبين يابو احمد.. انتو ناس الكن قيمتكن بالضيعة ..وبعدين ماكل يوم بدك تعمل عرس لإبنك...

تعي واسعدة.. تعي بنتي صب كباية شاي لعمك وبوسي إيدو...

((دخلت سعدة  مستحييه ووشا أحمر متل الفطيرة وبصوتا النيعيم: كيفك عمي 

باست إيدو وحطتا عراسا 

-- الله يرضى عليكي يامأدبي يابنت الأصول.. ونيالنا على هالكنّي الله يجعلك بديار كل مْحبّ ياسعدة .. 

شفط أبو العريس إيخر شفة من الجاي وضب كيس التتن بجيب الساكو وقلن :-

- دي  عن اذنكن ياجماعة خليني أنا روح هلّقيني وخبّر الكل منشان يجهزو حالن...بخاطركن..

 ---------- 

((يوم الاحد الصبح متجمعين كل لمحبين  قدام بيت العريس .. وشلعة عجيان  متكومين بجنبن مقرنصين م البرد.. إي قلّي إيش جيبرون قرود الأرض..  ونيطرين كلن  البوصطة تيروحو ع جيب لجهيز من الجسر..))

(( وقدام بيت سعدة واقفين سعدة وأمّا وأبوّا وخالتا ام كحلة😅 )) 

------- 

عغياب الشمس وقفت البوسطة ونزلو منا الشعب وحيملين الشناتي والكياس الكبيري.. وكراتين لقزيز والطنيجر.. ووراهم صفّ بيكاب محمّل خزاني وتخت حديد راصور .. وستّ مخدّات صمد وديواني وبوفير  فوقو مراي كبيري... 

وبلّشو هالنسوان بالزلاغيط والللليييش وأهل الضيعة عبّو لسطايح والزويريب.. 

وفي شبّاكين كان  فيّون جوز نسوان ميطّات رقباتن وعم يقلّبو  بشفيتيرون وماعيجبن شي.. أكيد عرفتو مين هنة..😉 

انتظرونا على مدّ الجهيز..  

ريت الفرح بدياركن جميع....

✍️فادية حسون