عرسٌ شعبي 1

.قوّاكن الله..

-- شْباك يابو أحمد شايفتك صِيفن وكل نفخة بتطبخ طبخة..أشو قصتك قلّي بإيش عمتفكّر 

-- لك يامرا عمفكّر بهالصبي أحمد صرلو خمس شهور متسرّح م الجيش ولازم نسعالو ببنت الحلال.. 

-- ومين قلّك ماني حيطّا ببالي هالشغلي وشايفتلو عروس كيّسي وبنت حلال.. 

بتعرفا أكيد بنت أختي خديجي متربّاي أحسن ترباي وسمعتا متل المسك ومابتردّ جوابات.. وبتعرف تحلب البقرة وبحضي عليها ضربة قدّوم مالا مسيل..

ومابتعيقا شغلي الصلا عالنبي ..

-- بحضّي عرفت

 ريحا تشدّي الحبل لصوبك .. هلّقيني بنت أختك خديجي  كتير شايفتيّا مناسبي لابننا أحمد.. أحمد مسقّف ودِيرس معو تاسع وبنت اختك طسمي مابتعرف تفكّ الحرف ولا بتعرف الخمسي من الطمسي .. وبعدين كتير ناصحة وسمرا حادقة الله يستر عليّا وابنك سمبتيك وبدو وحدة ديرسي وفهماني وكيّسي متلو.. وأنا شايف بنت عمو جمعة بتناسبو أكتر .. معا سادس وبيضا عليّا  لحسة لبن متل مابقولو ..وجسما كيّس البركي حطّي الخاتم من راسا بينزل لكعابا.. ووقت بتشرب المي بتبيّن قرصوبتا...أنا خيّو اللي بدي اخطبا لابني بدي ياها اذا وقفت بتزيّن واذا بركت بتبيّن .. 

((سمع أحمد اللقش وفات عالعلّيه وقلّن )):

 -- يبوو .. يموو شايفكن عم تفصّلو وتقيّسو عكيفكن... أنا لابدي بنت عمي ولابنت خالتي الله يستر عليون.   انا حيطط ببالي بنت  إيدا مراي لنص بنات الضيعة.. وعيجبتني هالمخلوقة من قبل ما انسحب عالجيش .. بقا اذا بدكن ياني كون مبسوط اطلبولي هالمستورة يبو .. 

-- وبنت مين بلا صغرا..؟؟  ليك اذا مامن عيلي كبيري ومعروفي وبنت اصل وفصل لاتفتح هالسيري أحسنلك ها..

عقولة المتل البنت اذا ما نفّقوها خدودا بنفّقوها جدودا..

-- رح تعجبك يبو وتعجب أمي كماني.. ( سعدة) بنت أبو صطيف حج سماعيل  تبع المقلع .. هالبنت كتير خيرطا مشطي ومعبّاي راسي..وكيّسي ومأدّبي ومتعلّمي ومعبّاي مركزا أشو رأيكن؟ 

الأم: 

-- بحضي بديني جبتا..  هالبنت ريكزي وبنت خلق وعالم.. خلينا ندق الحديد وهوّي حيمي يابو أحمد ونروح بعد العشي نطلبا من أهلا .. مابدنا حدا يشوفنا نحنا وريحين😎 مشان مايخرّبو علينا.. بتعرف اذا واحد بحبك عشرة بيكرهوك.. وأهل الضيعة روح قلبن الحَرّ واللّوص..بلكي ماصار نصيب 😏....

-- اي بس مالازم نشاور خواتي؟  بلكي إلون لقش تاني🤔..

--دخيييلك ..  ليش من ايمتا خواتك بشاورونا..أخوك جمعة خطّب جوز بنات ماحسّينا ودرينا غير ريحين عمشتراة الدهب.. وأخوك صبحي جوّز ولادو لتلاتي انعزمنا متلنا متل الغريبين.. بعدين هلّقيني سلايفي بدن يتبوجقو ويقولو بين بعضن ( بنت الدار عورة) وبدّن يحطّو ألف عزر بالبنت بس عمنّو ماخطبنا من عندن.. يرحم أبوك دشّنا منن.... وخليني روح من راسي لراسك لأنو بس كترو الطبّيخين بتشوط الطبخة... 

-- شحّاري شقدّيني متعبّاي من سلايفك😁.. دي خلّصي شغلك وجهّزي حالك.. بس ليكي.. حطيلك كم قرص سوركي بشي قبّوع ورق .. وعبّيلك سطل حليب من حليبات المسا ماحلوي نروح لعندن ايدينا فاضيين عيب اول مرة مندوس بساطن🤗...

((أحمد وشّو أحمر وصار يفرك ديّاتو ببعضن)) : 

الله معكن.. لا تتعوّقو كتير ها نيطركن ..

((أبو أحمد هوّة  وعميلبس الحدوي بالكرَتا وحيطط السيكارة بتمّو ))

--شوفي العكروت شوفي...

((أم أحمد عبتضحك ))

-- الله يتمملك على خير يابني وتكون هالبنت من نصيبك..ولايشمّت حدا فينا...😍

بكرة بدنا نحكي على تفاصيل الطليبة.. بدّنا جاها من كباربة الضيعة..البحب يتفضل معنا أهلا وسهلا بتلاقونا ببيت أبو صطيف حج سماعيل .🤗

اقعدو بالعافي..

✍️فادية حسون