عرسٌ شعبي _3_الخطبة

 الخطبة🤗

وقّفت نوال بنت أبو احمد بباب البيت وهية وعم تلحمس على تييبا  وعم تطقطق بقندرتا العتيقة وكأنو حيبّي تهريّا هاليوم بالعزيمي عالخطبي بعد مااشترت وحدي جديدي ....

نوال: 

-- دي خلّصينا يمو تأخرنا والله للمغرب مامنخلّص دوارة بالضيعة... 

--اي يابنتي اي.. مانك شايفي الشّملي بإيدي.. ضل ميل واحد بدّو تْقُصقُص .. بس هيّيه منتوكل على الله.. صلّي يومين وأنا عم بشتغلا للشّاشيه منشان ألبسا مع الشِّيلح الجديد عالخطبي.. الهي بجاه هالليلة الجمعة والملايكي مجتمعا يفرّحني فيكي بإبن حلال يستيهلك ... دي خلّصت خلينا نمشي بقا  ..

تورّد وشّا لنوال من كتر مااستحِت .. وشنكلت أما وراحو..

-- يوووو ام محماااد وينكووون....

-- تفضّلو أهلا وسهلا بأم أحمد 

--الله يزيد فضلك.. اتفضلو ع خطبة ابني احمد عبكرة العصريات... 

-- ساعة خير ان شاالله .. وبنت مين عبتخطبيلو بلا ظغرا.. 

-- سعدة بنت أبو صطيف حج سماعيل..

-- ملّا صبيه الصلا عالنبي..  والسّبعتنعام والله.. نعم العالم.. الله يهنيكن ربي وتشوفو ع وشّا الخير...

-- الله يسلّمك والنعم منكن.   عقبيل حجك وفرحة ولادك  محمد ونديرة.. 

-- يووو ام براهييييم ......

يوووو بيت ابو علي......

يوووو ام سليمان.... 

نوال: يمو  ماقلتيلي 

... ليش ماريحا تعزمي بيت ابو جمال العبسي 🤔

-- والله محتارة يابنتي.. متضشمن هوة وأبوكي صرلن وهلي.. والله ومنشان شغلات ظغيري مابتستيهل .. 

كل كم يوم بيطلعلنا ابو جمال ببمبوقة شكل .. شييي  قال ابوكي طيحيش  عالتخم تبعو.. و شييي جيحاتنا نكشولو المشيتل .. وشي ابوكي سرقلو خيطين تتن من السّقالي تبع الدخّان .. وكل الضيعة بتشهد بسمعة ابوكي وخلاقو...

سبحان الله عينو ديقا وزمّتو ماكيسي هالزلمي.... ((يالله مابنّا  نستغيبو)) 🤫... بس مع هيك بدي اعزمو أشو زنب عيلتو.. وأنا متأكدي ابوكي مابيلقش  شي .. نسيت ما آخد رأيو  قبل ما يدق درب طريقو ويروح عكفرنجي  ليشتري تلات نصّيات حلاوي وكم كرتونة راحة منشان نفرّقن للمعيزيم ...

-- يوووو خيي أبو جماااال.. وينكون ..قوّاكن الله..

--قوّاكي الله بالعافي.. اتفضلي خيتي ام احمد أهلا وسهلا  ...

........ 

-- شفتي يابنتي قِبِل العزيمي.. والله عند الحزّي واللزي أهل ضيعتنا كلياتن  إيد وحدي .. 

(( تاني يوم.. الجمعة قبل العصر 

بيت العروس..))

أم العروس ملبوكي ومتل مكوك الحايك ريحا جاي وعم تقلب مخدّات الصمد مداير داير البيت منشان يقعدو عليهن الخطّيبين بعد ماعلّقت سدّاجة الحيط مشان البرزي وعلقت عليها شوية ورد بلاستيك من المزهريّ هية وبنيّات الجيران  : 

-- فتحت الباب محل ماعم تشتغل الكوفيرا: دي عجّلو شوي ياصبايا مابَقَتْ إلا يوصلو أهل العربس.. وبلّشو يجو المعيزيم 

((الكوفيرة وهية حيطّا كمشة حبّاسات بتمّا )) 

-- اي اي خالتي ام صطيف .. خلّصنا ماضلّ غير الفكستور.. زاتو الغوا خالص بقيان الحمرا .. الله يسعدا لسعدة طالعا متل القمر نيّال عريسا فيا صبية ملخ الصلا عالنبي ...بس خالتي ماتنسي تحضّري فردة جراب نسويني منشان تلبيس السوارات.. هديك اليوم حضرت خطبي جرحولا دياتا للعروس شحميطا ... 

-- مجهّزي من أولة مبيرحا..

(( سعدة غمزتا للكوفيرا الغمزة اللي متفقين عليّا من قبل  )) 

-- خالتي ومين بدو يلبّسا الدهبات لسعدة .. والله ماعليه شي اذا بلبّسا العريس خْطيْ خليون يفرحو..

-- والله ياعين خالتك حماتا بدّا تلبسا المصاغات..

أبوّا وخواتا مابيقبلو يلبّسا العريس وبعدين هيك عوايدنا ليش لنكون متل العين المقلوعة...

((عيّنت الكوفيرا بسعدة ورفعت كتافا وقلّبت شفيتيرا 🤷🏻‍♀️ ))

((شوية ولاد ركضو وعم يلْهَتو ))

- اجو اجو اجو....

(( أم مرعي عمة العريس..مطقمشة حالا ومتصدرة ومشنكلي بإيدا هالجزضان الخمري اللمّيع وليبسي نص كيلو دهب.. وإيدا على تمّا وعم تزلغط )) : 

آآآ وبيت حج سماعييييل يانمل السجر..

آآآ ونبعتلكن المي من تحت الحجر 

آآآ وجميلكن محمّلي حنّي 

آآآ ومشيتكن مع الوزاااار .. للللللييييش 

((ردّت عليها خالة العروس كانت خجلاني شوي ودياتا عم يرجفو بس كحلتا لورا دنيها.. ))

آآآ وأهلا وسهلا فيكوون 

آآآ والملايكي تجليكووون 

آآآ ولايغرق مركبكووون

آآآ ولا يشمت حدا فيكوووون لللللييييش ...

-- تفضلو..تفضلو أهلا وسهلا فيكون...اهلا وسهلا 

((ام العريس نزلت عالنّص لترقص هية ونوال والعمة  ..عطتا الدربكّي لفاديا لانّا دقّيقة دربكي بتخلّي اللي بعمرو مارقص يرقص.. وفتحتلا ام مرعي بغنّايتا المشهورة ... ))

أوّل عِشرة محبوبي ياعيني وهداني خاتم ألمااااس 

وهادا قصدي ومطلوبي ياعيني وهاد اللايق بين الناااااس ...

فقّصو فقّصو يانسوان..👏👏👏 أشو محنّايين دياتكن..

دقّي فادوووو.. 

(( نسوان لعمام قيعدات محيدي بعض وعم يتلقوشو ويتغامزو وعم يفقّصو .. فض عتب  )) 

أم احمد :

-- شدّي هالبنيّات عالرقص يابنتي.. 

دي قومو يابنات قومو من ايش خجلانين عقبيل سعادتكن يااااارب 

 .. 

(( إجت وحدي من الجيران شوشرتا  لام احمد بدانا: قال بقلك ابو أحمد خلصونا بقا.. لبّسو الدهب وضيّفو المعيزيم و مدّو الشملي منشان لمّ النّقطة العالم بدا ترجع عبيوتا صارت المغرب واكتريتن عندن دبّات ... 

مدّت أم أحمد الشملي بالنص.. وبلّشو النسوان يضربو دياتن بعبّن  وبجيوبن ليطالعو النقطة وهنة عم يلعمطو الحلاوي والراحة بلسيناتن..

نسوان لعمام القيرحات عينيهن  عالشملي ليشوفو شقد بدو ينلم نقطة...وكل شوي يتوشوشو : 

-- شوفي هالمكولكي مرت فوزي حسينو حطت الخمس ورقات وهية ريفعا ايدا منشان تبيّن..  شقد هالعالم بحبو البهورة.. 😏

-- ردّت سلفتا :  ستي اللي معو أشو بيمنعو ..😉

-- ليكي مرت حج حمّود بحضي ماقصّرت بأم أحمد لأن سلفتنا عندا ياها بالدنيا وشايفتا وما مسدّقا ... 

نصّصّ ليرا ياالله 😳

- هه ..هاي قيمتا عندا .. اصنتي اصتتي بقا  خلينا نتأرّج👀

(( لمّت أم العريس الشملي.. والمصريات جواتا عم يقرقعو.. وراحت عالغرفي الجوينيه بعد ماغمزت أم العروس لتلحقا منشان يعدّو النقطة قبل مايعطوها للعروس ... وخالة العروس صارت توزّع الجرابات ومحارم لقماش عالنسوان..   )) 

-----------------------

(( أعتذر عن الإطالة بسبب كثرة التفاصيل والمقام لايتسع لكل المقال.. ربما أغفلت شيئا  دون قصد فاعذروني...والأسماء الموجودة في القصة ربما يصدف وجودها على أرض الواقع لكنها من نسج خيالي... )) 

عقبيل فرحة ولادكن ياجماعة...بس يحددو العرس منعزمكن 🤗

✍️فادية حسون...