عرسٌ شعبي _2_

قوّاكن الله..

طليبة سعدة 😍

-- هلق قلي يابو أحمد .. خبّرت أهلا للبنت أنو بعد صلاة الجمعة مشاينين لعندن عالطليبي ؟؟ 

-- اي اي خبّرتن .. ومن مبيرحا  خبّرت كبارية الضيعة.. المختار أبو شريف.. وشيخ الضيعة.. وحج حسين كماني بتعرفي هاد رجّال مقدّر والو هيبتو.. وحج ياسين كبير العيلي.. وأستاذ المدرسي ..و أبو زياد جارنا.. وجوز أختي أبو مرعي..وخواتي جمعة وصبحي وعلى راسن أبوي الحجي الله يطول عمرو...

-- بدي كل الضيعة  تسمع بهالطليبي .. هادا أبننا أحمد على سن ورمح ماحيّالله .. بعدين عيلة العروس بيستحقّو الواحد يعملّن قدر وقيمي .. 😊 حسب ...  ونسب.. ومصاري كبّ $... يعني عينن شبعاني ومانن عديمين ..   ولّا هالسعدة دخييييل اللي خلقا مكيسا بحضي بتسوا  بتقْلا ... وإزا الله خلّاني طيّبي لحتى شنشلا بالدهب وخلي  الأعادي يطقو ويفقعو...

ويوم الخطبي بدي زلغطلا أول مابشوفا:  آآآ يامين شعرو على كتافو كداس كدااااس... آآآ وياميين دبّل عيونو من غير نعااااس.. آآآ وشبّهت حمرة خدودك لوردتين بكااااس.. 

آآآ سمعا وطاعًا تجيرك من عيون النااااس..  وليليليليييييش ..

-- الله يثبّت علينا العقل والدين.. قرد شباكي جنيتي.. طولي بالك لحتى نطلبا للبنت واهلا يوافقو وبعدين اعملي البدّك ياه.... 

دي روحي روحي  جهّزيلي الشرويل الجديد والجلابي البيضا والطاقيه اللي شتغلتا أختي أم مرعي  لبين ماخلّص حلاقة دقني .. فقّعني هالشايع الموس بحضّي صاير مابيقطع اللبن..

 بتعرفي يعني هاليوم  لازم هندز حالي وضارب عالعريس...😄

--  والله بحضّي جهلان و عينك زايغة   اكتر من شباب هالايام .. دي خلّصنا بقا هلق بأدن الشيخ وبتبلش خطبة الجمعة والجماعة اكيد سبقوك عالجامع ...

-------------- 

-- يووووو أبو صطيييف ..

-- تفضلو تفضلو أهلا وسهلا شرفتونا ياجماعة الخير..  اهلا وسهلا فيكن.. يابْني يامصطفى حط نفّاضات قدام لضيوف...وخلّي يحطولنا القهوي عالنار...مية السلامي شرفتونا...

(( تنحنح الجدّ وجلّس قعدتو بعد ما تصدّر بالقرنية)) 

--  ياخيي ابو صطيف جايينك انا وهالناس الطيبي منشان نطلب ايد المحروسي بنتك لأبن ابني أحمد على سنة الله ورسولو .. ونحنا متل مابتعرف ولاد ضيعة وحدي .. 

(( صفن أبو العروس شوي قال بدّو يتقّل حالو )): 

--منتشرّف فيكون وبنسبكن والله ياحجي ومارح يصرلنا أحسن من عيلتكن.. وبقول المتل ياللي متلنا تعا لعنا.... ونحنا تشاورنا صرلنا من يوم اللي بعتو خبر بيت ابو احمد..  وبحضي مارح نلاقي احسن منكن.. وهالجَمعا الكريمي مابتنرد خايبي.. معقول نرفضكن لاسمح الله.. 

(( الجد ريفع راسو وفتّل شويربو )) : 

-- الله يبارك فيكم يابو صطيف...مزال تمت الموافقة خلينا نحكي بالنّقد بحضور هالجمع الكيّس .. وخلوني انا احكي وان شالله مابتكونو غير رضيانين.. 

-- تفضل تفضل ياحجي انت كبيرنا وبركتنا وبلاك مامنسوا قشرة بصلي..

-- انا بقول يابو صطيف بنت الاصول مابيغلا عليها شي..  وانا من عندي بحكي كلمي وحدي...النقد خمسمية ورقة سوري ميتين مقدّم وتلاتمي مأخر.. وبنّا نشتريلا ست مبيريم تخان .. وعقد مشخلع يعبّي رقبتا للعروس ..هيك بدا أم العريس .. وبعدين عالعرس كمان منشتري مخمّس وزرَدي اذا الله أحيانا .. أشو قلتو.... ؟؟ .

((أبو صطيف تصدّر وانبسط ))

-- مامنزيد عليك حرف ياحجي واللي بدو يناسب مابحاسب.. ومشان المأخر أشو رأيك تحطو بإسما  شقفة أرض هيك بكون أحسن من المصاري..

(( الجد دقّ على صدرو )) 

-- مابيغلا عليها لكنّتنا واشو رأيكن نعمل الخطبة بعد أزبوع.. الجمعة الجاي متل هاليوم .. ومن بكرة بروحو النسوان والعريس والعروس على كفرنجي ليشترو الدهب والبدلي وكندرا وشوية غوا...  

أبو صطيف: 

-- انتو فصّلو ونحنا منلبس اتكلو على الله 

((شيخ الضيعة فتح دياتو ))

 

-- سمعونا الفاتحة على نية القبول  ياجماعة ... 

        (( الفاتحة )👐

ابو صطيف: 

-- دي تفضّلو مدو ايديكن اشربو القهوة...

الكل معزومين عالخطبة يوم الجمعة الجاي 👏.. جهّزو النقوط ..

✍️فادية حسون